Góð afkoma Íslenskrar fjárfestingar á árinu 2022
Íslensk fjárfesting ehf. skilaði hagnaði að upphæð 1,7 milljörðum árið 2022 og hækkaði eigið fé félagsins úr 2,7 milljörðum í 4,5 milljarða kr. Mikill viðsnúningur varð í rekstri félagsins frá fyrra ári, en það ár gætti töluverðra áhrifa af COVID í ferðaþjónustufélögum samstæðunnar.
Ferðaþjónustufélögin náðu að snúa við blaðinu og skila mjög góðu rekstrarári þrátt fyrir að áhrifa COVID hafi enn gætt í byrjun árs 2022. Heilt yfir voru þó áhrif faraldursins lítil á flest félög samstæðunnar á árinu. Þá var á árinu lokið við nokkur stór fasteignaþróunarverkefni og unnið að sölu á nokkrum þeirra. Hagnaður félagsins á árinu 2022 nam 1.709 m. kr. samanborið við taprekstur upp á 627 m. kr. árið 2021.
Heildareignir félagsins í árslok námu 8.654 m. kr. og var eigið fé félagsins í árslok 4.503 m. kr. samanborið við 2.681 m. kr. árið 2021. Félög innan samstæðunnar eru búin að ná fyrri styrk og eiginfjárhlutfall móðurfélagsins var um 52% í lok árs 2022.
Eignir í félagsins í ferðaþjónustufyrirtækjunum Kilroy og RR hótel eru færðar á kostnaðarverði en stjórnendur telja að raunverulegt markaðverð þeirra sé mun hærra.
Íslensk fjárfesting fjárfestir fyrst og fremst á fjórum meginsviðum: Ferðaþjónustu, heilbrigðisþjónustu, fasteignum og útivist og hreyfingu.
Ferðaþjónusta
Kilroy sem er stærsta félag samstæðunnar er með höfuðstöðvar í Kaupmannahöfn og rekur ferðaskrifstofur á átta mörkuðum í norðanverðri Evrópu. Helstu vörumerki félagsins eru KILROY, Benns, Jysk Rejsebureau, Winberg Travel og ISIC.
RR Hótel rekur fjögur vörumerki: Reykjavík Residence hótel, Port9 vínbar, Tower Suites Reykjavík og ODDSSON hótel.
Heilbrigðisþjónusta
Íslensk fjárfesting hefur fjárfest í heilbrigðisþjónustu og þá fyrst og fremst í öldrunarþjónustu í gegnum félagið Sóltún heilbrigðisþjónusta ehf. Helstu fjárfestingar þess eru: Öldungur hf. sem rekur hjúkrunarheimilið Sóltún. Sóltún öldrunarþjónusta sem rekur hjúkrunarheimilið Sólvang og Sóltún heilsusetur sem og Sólstöður sem er atvinnumiðlun fyrir heilbrigðisstarfsfólk.
Fasteignir
Helstu fjárfestingar Íslenskrar fjárfestingar á sviði fasteigna eru í gengum tvö félög; Íslenskar fasteignir ehf. og Fasteignafélag Íslenkrar fjárfestingar ehf.
Íslenskar fasteignir er fasteignaþróunarfélag sem sérhæfir sig í verkefnastjórnun og umsjón við þróun fasteigna. Fasteignafélag íslenskrar fjárfestingar er alhliða fjárfestir á fasteignamarkaði en hefur að mestu leiti fjárfest í eignum sem eru í útleigu til fyrirtækja innan samstæðu Íslenskrar fjárfestingar.
Útivist og hreyfing
Þetta er nýjasta fjárfestingasvið Íslenskrar fjárfestingar. Núverandi fjárfesting er í fyrirtækinu Útilíf sem er gamalgróið fyrirtæki á þessum markaði. Félagið rekur í dag þrjár verslanir undir merki Útilífs og eina undir merki The North Face.
Íslensk fjárfesting leitast við að vera meirihlutaeiganndi eða í leiðandi stöðu í þeim verkefnum sem fjárfest er í, þó á því finnist undantekningar. Áhersla er lögð á að styrkja grunnstoðirnar fjórar þó að stöku sinnum sé fjárfest í öðrum verkefnum. Af slíkum verkefnum má t.d. nefna: Leitar Capital Partners, Vonzeo Capital, Florealis og Eldey eignarhaldsfélag.
Hjá fyrirtækjum í meirihlutaeigu Íslenskrar fjárfestingar starfa 987 starfsmenn (765 í fullri vinnu). Hjá móðurfélaginu starfa fjórtán manns sem sinna fjárfestingum, þróun verkefna, fjármálastjórnun, lögfræði, framkvæmdastjórn og utanumhaldi.
Íslensk fjárfesting er fjárfestingarfélag í jafnri eigu Arnars Þórissonar og Þóris Kjartanssonar.
Í stjórn Íslenskrar fjárfestingar eiga sæti eigendur félagsins: Arnar Þórisson, stjórnarformaður og Þórir Kjartansson, meðstjórnandi og framkvæmdastjóri.