Hagnaður Íslenskrar fjárfestingar ehf. á árinu 2024 nam 133 milljónum króna. Niðurstaðan var undir væntingum stjórnenda, en skýrist helst af því að verulegar tekjur sem tilheyra árinu fluttust yfir á árið 2025, auk þess sem nokkur félög innan samstæðunnar stóðu í umfangsmiklum umbreytingarverkefnum sem voru að mestu leyti gjaldfærð.
Félagið starfar á fjórum megin sviðum: ferðaþjónustu, fasteignum, heilbrigðisþjónustu og útivist og hreyfingu. Í ljósi þeirra verkefna sem standa nú yfir á sviðunum fjórum búast stjórnendur félagsins við góðu rekstrarári á árinu 2025
Kilroy, alþjóðleg ferðaskrifstofa í eigu félagsins, skilaði 439 milljónum í hagnað og velti 29,4 milljörðum. Flóra hotels fjárfesti á árinu í mikilli uppbyggingu og hefur nánast tvöfaldað rekstrartekjur sínar og mun reka 313 herbergi um mitt ár 2025. Stafir fasteignafélag var með eignasafn að verðmæti 10,9 milljarða og hagnaður Íslenskra fasteigna var 42,4 milljónir kr. á árinu. Heilbrigðissviðið skilaði 118 milljónum í hagnað. Þá heldur vegferð Útilífs áfram eftir umtalsverðar breytingar síðustu ár og verða þær áherslubreytingar lykilverkefni Útilífs á árinu.
Íslensk fjárfesting er fjárfestingafélag í jafnri eigu Arnars Þórissonar og Þóris Kjartanssonar. Innan samstæðu félagsins starfa yfir 1.000 manns. Hjá móðurfélaginu starfa sérfræðingar sem sinna fjárfestingastýringu, verkefnaþróun, fjármálum, mannauðsmálum, lögfræði og framkvæmdum. Með tilliti til fjölbreyttra verkefnaþróunar á öllum kjarnasviðum samstæðunnar horfa stjórnendur björtum augum til ársins 2025.
Heildareignir móðurfélagsins voru 6.240 milljónir króna í lok árs 2024, en eignir samstæðunnar voru rúmlega 24,2 milljarðar króna. Eigið fé móðurfélagsins nam 4.688 milljónum króna og eiginfjárhlutfall var 75% við árslok.